أرشيف / November, 2013

Moving from Riyadh to Dammam

السلام عليكم أعزائي…

أسوء اللحظات اللي تمر علي في الحياه هي لحظات الإنتظار . هذا الوقت الضائع اللي يجي بدون تخطيط ويضيع بدون فائده . وإذا قدرت تستغله أحسن إستغلال فأنت ناجح

image

من شهر رمضان قررنا الإنتقال من الرياض الى الدمام ، أنا من الناس اللي ماعرفو يتأقلمون مع جو الرياض المزدحم وتباعد هالمدينه ، وكثرة سفري ساهمت في هذا الشيء. على أي حال ، قرار النقل اتخذناه في شهر رمضان ولازلت الى الآن أنتظر !! أسباب كثيره أخرت عملية إنتقالنا الى بيتنا الجديد اللطيف الكائن بالدمام واللي أحبه كثير كثير

وبما أني الحين في بيت والداي بالدمام اضطريت إني أغلف اغراضي كلها و من بينها مصنعي الصغير عشان اتأكد انها را تنتقل بسلام وأعلنت في المتجر ان خدمة الطباعه متوقفه ، لكن ماتوقعت ان المده را تطول كذ:/

في الثلاث الشهور الانتظار الماضيه حسيت وادركت يعني ايش وقت ضايع ، لقيت كثير ناس تطورت وكثير ناس كونت نفسها وانا انتظر، طيب ليش الإنتظار؟ فكرت كثير كيف استفيد من الوقت و راسي عورني من كثر التفكير

image

بعدها قلت ليش أفكر ؟ أمسك قلمي وارسم وإيش ما طلع معاي يطلع المهم مايروح وقتي بدون عمل . وكنت كل مارسمت شي

انزله كبوست في انستاقرام واعمل له هاشتاق والنتيجه كان هذا الهاشتاقين في انستاقرام

image

#ندى١٤رسمه_في_١٤يوم عباره عن تحدي إني ارسم ١٤ رسمه في ١٤ يوم يعني في كل يوم رسمه جديده . الهدف من هذا التحدي إني أمرن أصابعي عالرسم ، وارسم رسمه كامله بدون نقص، وانفذ كلامي بدون تأخير وأخلص الرسم حسب الموعد، وكنت لما يمر يوم بدون رسم اعاقب نفسي اليوم اللي بعده بأني ارسم رسمتين بدل رسمه وبكذا اقدر الحق عالوقت على فكره خسرت التحدي بفارق رسمتين !! صحيح رسمتهم في اليوم رقم١٥ ولكن فعلاً الإلتزام بالموعد مو شي سهل وأنا مبسوطه إني اتعلمت هالشي من هذا التحدي

image

http://youtu.be/ViGoG4np1QI

 

#مسابقة_الزي_السعودي_ندى عباره عن مشروع رسم لشخصيات كارتونيه بأزياء سعوديه لمتجري ، هالشخصيات راح تشوفونها مستقبلا مطبوعه بعض المنتجات. حبيت اعملها على شكل مسابقه لمتابعيني في انستاقرام بحيث ارسم الشخصيه وهم يخمنوا المنطقه اللي اهلها يلبسون هالزي ، الهدف هو تنشيط حسابي في انستاقرام ، وفي نفس الوقت اشجع نفسي اكمل المشوار اللي بديته لما اشوف حماس المتابعين ، وبصراحه حبيت هالمشروع اللي فتح عيوني على أزياء سعوديه ماكنت اعرف عنها ابدا ، ازياء جميله جداً وفيها كثير تفاصيل وألوان وحبكه في القماش ، انصدمت بكمية الفن في تراثنا السعودي وحبيت جدا اني استمر في هذا المشروع حتى أعرف الناس على تراثنا المندثر الأزياء الأوروبيه اللي كنت مبهوره فيها وأحب أرسمها ماعادها تبهرني مثل أول، بالفعل صرت أميل لرسم التراث السعودي وهذا الشي فرحني كثير وللأسف المحتوى العربي في هذا الموضوع قليل جدا ، بحثت كثير ولا لقيت مرجع دقيق في الأزياء السعوديه ، وبصراحه هذا الفيديو خدمني كثييييير . شكراً كبيره لمنسوجات

أتمنى ما أكون ثقلت عليكم بتدوينتي هذي وانا لازلت في فترة إنتظار ولازلت اشتغل على نفسي والفرج قرب والحمدلله أتمنى تطلعوا على الهاشتاقات اللي ذكرتها في انستاقرام اذا حابين تتفرجو عالرسمات وتعطوني رايكم من خلال التعليقات سواء في انستاقرام او هنا واذا تحبون تتابعوني هذا حسابي @Nada_MUG في تويتر وانستاقرام

عوده للتدوين

السلام عليكم متابعيني الأعزاء

 

 

يااااااه يالتدوين !! إشتقت له كثير T_T

 

:وجه يجهش بكاءً:

 

من كم يوم راسلتني وحده تسألني وينك ياندى عن التدوين من زمان ماكتبتي شي؟!!

 

بصراحه هذا سؤال وجهته لنفسي كثير الفتره الأخيره ، ليش ماعاد إهتميت بكتابة مذكراتي كالسابق؟

 

لقيت إني صرت أهتم بالتويتر والانستاقرام أكثر بكثير من مدونتي ، هذي المواقع ريحتني كثير من التدوين وأشبعت حبي للمشاركه دون الحاجه لكتابة الكثير من الكلمات

 

لكن مع الوقت إكتشفت شي مهم ، كثير وصلتني تعليقات من البنات يطلبون مني العوده للتدوين

 

إكتشفت سبب محبتهم لطريقتي القديمه لتسويق منتجاتي عن طريق التدوين بدلاً من مواقع التويتر وانستاقرام

 

لاحظت الفرق فعلا خلال الفتره اللي تركت فيها التدوين قل التواصل بين المتابعين والمدونه وبالتالي أثر هالشي على علاقة متابعيني بالمتجر ومنتجاتي

 

بينما لما كنت أدون عن متجري كان فيه تواصل قوي مع المتابعين والعملاء

 

بالعربي كان فيه حياه وطعم للمتجر

 

 

 

والحين وبعد ماحسيت بالخطأ اللي وقعت فيه أحب أقولكم إن ندى القديمه رجعت وراح أحاول أنتظم بالتدوين قد ماأقدر

 

كونو بالقرب 3> 3>